పది వేల అడుగుల పై నుండి

 నిరాశా నిస్పృహలతో

భవిష్యత్తు గురించి భయపడుతూ

బండి మీద సాగిపోతున్నాడో నిరుద్యోగి.

వాడి భవిష్యత్తు గురించిన ఊహల్లానే

రోడ్డు మీద వెలుగు నీడల చిత్రాలు వేసి

చెరిపేస్తోందా బండి హెడ్ లైటు.

పది వేల అడుగుల పై నుండి

విమానం కిటికీ లోంచి చూస్తోందో పిల్ల !

భూమి మీద నక్షత్ర సమూహాల మధ్య తరలిపోతున్న

ఓక తోక చుక్కలా కనిపించిందా బండి లైటు.

ఆ ఉహకి పాప పెదవులపై ఒక చిరునవ్వు విరిసింది

ఆ ఆనందం చంద్రుని వెన్నెలలో కలిసి అతని పై కురిసింది !!

అతని జేబులో సెల్లు చిన్నగా మోగింది,

మొన్న వెళ్ళిన ఇంటర్వ్యూలో సెలెక్ట్ అయ్యావు అనే వార్త మోసుకొచ్చింది!

అతనింకా ఆలోచనలోనే ఉన్నాడు..

మంచి వారికెపుడూ చెడు జరగదని తెలియదతనికి !!

*

(ఫ్లైటు కిటికీ లోంచి చూస్తుంటే, ఒక సర్రియల్ ఫీలింగ్.

పై నుంచి నాకు నయనానందకరంగా వెలుగులు,

ఇళ్ళూ బళ్ళు నాకు చిన్న చిన్న మెరుపులు,

కాని వారెవ్వరికీ నా ఉనికి కానీ,

నేను ఈ సెకను వారిని చూస్తున్నా అని గాని,

మా ఈ మెరుపు పరిచయం కానీ

నా ఆనందం కానీ తెలియదు.. ఆ నిమిషంలో రాసిన చిన్న రాత !)