అంశం : "నువ్వు రావని తెలిసి.."
శీర్షిక :-)
*
నీకై, నిరంతరం వగచి
నువ్వు లేవన్న సత్యం మదిలోనే దాచి
నలుగురిముందూ నటిస్తూ
ఎన్ని రోజులు గడిపానో నాకే తెలుసు.
*
తలపై పెట్టుకు నిన్ను చూసుకున్నందుకు
తలపులనే నాకు మిగిల్చావా?
అంతలా నిన్ను చూసుకున్నందుకు
నేలను తాకిన నల్ల మబ్బల్లే కరుణిస్తావనుకుంటే
ఏడారి మేఘమై నన్ను శపించావా?
*
నిన్ను తాకిన నా చేతుల పై
నీ మృదు స్పర్శ అనుభవం ఇంకా అలానే ఉంది
మునివేళ్ళతో నిను నిమురుతూ, నేను పోయిన వగలు
మది మరువనంటోంది
అరుణోదయ వేళ
గాలి తెమ్మెరలకు ఓలలాడుతున్న నిన్ను
మురిపెముగ ముద్దాడుతూ, "నీవెన్నటికీ నా దానివే"
అని మురిసిపోయిన నాకు
మరుగయిపోయి, మరిచిపొమ్మంటే..మనసున్నదా నీకు?
*
నువ్విక రావని తెలిసినా
మది నమ్మనంటోంది
నీ రాక కోసం, పరితపించి పోతోంది
నీ కోసం నేను మొక్కని దేవుడు లేడు
అడగని సలహాలూ లేవు...అయినా,
ఓ కేశమా నీవెక్కడ ?
నా ఈ బట్టతలపై నీ కరుణెక్కడ?
*
అంశం : "నువ్వు రావని తెలిసి.."
శీర్షిక : కొత్త బట్టతల (నిజమే కావాలంటే మళ్ళీ చదవండి)
