అర్థమై, వాగర్థమై వెలసిన ఆది దంపతులు
పంచుకోడానికి మించిన ఉదాహరణ ఇంకెవ్వరు?
సృష్ఠేమో ఒకరు
స్థితికేమో మరొకరు
లయానికి ఇంకొకకరు
వరాలు ఒకరు, పరిష్కారాలు మరొకరు
పంచుకోవడం నేర్పారు మన దేవతలు !
*
ఒంటరిగా ఒక్కడే ఉండడుగా సూర్యుడు,
రోజుని రెండు చేసి
చంద్రునితో చెరి సగం చేసుకోడా?
ఆకాశం మొత్తం నా కోసమే అనుకుంటాడా శశి
చుక్కలతో చక్కగా పంచుకోడా?
నిమ్మకు నీరెత్తినట్టు నిలబడుతుందా చెట్టు
నిమ్మలూ దానిమ్మలూ... పళ్ళూ పూలూ
పంచిపెట్టదా ప్రజలకు?
*
తల్లినుండి విడిపడ్డానని తల్లడిల్లిన శిశువు
తొలి ఏడ్పుతో తన భయం తల్లితో పంచుకుంటుంది
అమ్మ ఒడి అభయం సాధించుకుంటుంది.
తనువు చాలించిన శరీరం, తనకిక ఏమీ వద్దంటూ
పంచభూతాలకు తన తనువు పంచి ఇస్తుంది.
ఆ పంచుకోవడం తో మొదలై,
ఈ పంచివ్వడం దాకా సాగే పయనమే కదా జీవితం?
*
గారాలూ పోతూ, ఆప్యాయత అంతా అమ్మతోనూ
భయం వేస్తే, భరోసా కోసం నాన్నతోను
ఆటపాటలు అభ్యుదయాలు సహోదరుల తోనూ
అల్లర్లు ఆదరణలు మిత్రులతోనూ
గౌరవాలు సలహాలు గురువులతోనూ
పంచుకోవడమే కదా సర్వస్వం?
*
ఎప్పుడోకప్పుడు, ఎవరికోకరికి
పంచుకోడానికి ఎవ్వరూ లేరనిపిస్తే
ప్రార్థన చేస్తూ పైనున్న భగవంతుని తోనో
ధ్యానం చేస్తూ లోనున్న దేవుని తోనో
పంచుకోవాలి కదా?
*
ఎందుకంటే,
పంచుకున్న ఆనందం పదింతలవుతుంది
ఆక్రోసం అయితే పదో వంతు అవుతుంది
అన్ని సమస్యలకు సమాధానం దొరకక పోయినా
పంచుకుంటే మనసు సమాధాన పడుతుంది
ఏరు దాటి ఒడ్డు చేరుకోగలమనిపిస్తుంది !
-సత్య కీర్తి
